Поздравляем братьев сербов и всех Православных христиан
с Днем празднования Преподобной Параске́вы-Пе́тки Сербской!
Тропарь преподобной Параскеве-Петке Сербской , глас 2
Пусты́нное и безмо́лвное житие́ возлюби́вши,/ и во след Христа́, Жениха́ твоего́, усе́рдно поте́кши,/ и Того́ благо́е и́го во ю́ности твое́й взе́мши,/ Кре́стным зна́мением к мы́сленным враго́м му́жески вооружи́вшися,/ по́стническими по́двиги, посто́м, и моли́твами, и сле́зными ка́плями/ у́глие страсте́й угаси́ла еси́, достосла́вная Параске́во:/ и ны́не в Небе́снем черто́зе/ с му́дрыми де́вами предстоя́щи Христу́,// моли́ о нас почита́ющих честну́ю па́мять твою́.
Кондак преподобной Параскеве-Петке Сербской , глас 6
Святу́ю вси засту́пницу су́щим в беда́х,/ благоче́стно воспои́м Параске́ву всечестну́ю:/ та бо, житие́ оста́вльши тле́нное/ и нетле́емое прия́т бо ве́ки,/ сего́ ра́ди сла́ву обре́те,// чуде́с благода́ть Бо́жиим веле́нием.
Величание преподобной Параскеве-Петке Сербской
Ублажа́ем тя, преподо́бная ма́ти Параске́во, и чтим святу́ю па́мять твою́, ты бо мо́лиши за нас Христа́ Бо́га на́шего.
Молитва преподобной Параскеве-Петке Сербской
О, прекра́сная неве́сто Христо́ва, чи́стая голуби́це, позлаще́нная Ду́хом Святы́м, де́вственная похвало́ и пустынножи́тельная собесе́днице А́нгелов, насади́вшая на земли́ мы́сленный рай твои́ми доброде́телями, преподо́бная ма́ти Параске́во! Что принесе́м тебе́ досто́йнаго в дар, кроме́ смире́нных и гре́шных моле́ний на́ших, я́же прии́мшы, очи́стя я́ святы́ми твои́ми моли́твами и принеси́ к Жениху́ твоему́, Христу́ Бо́гу на́шему! Ублажа́ем тя, красото́ Се́рбскаго наро́да и на́ша засту́пнице и храни́тельнице, е́юже хва́лятся ца́рие и кня́зи. Ты, я́ко хра́брый воево́да, кре́постию, да́нною ти от Царя́ сил, обраща́ла со студо́м вспять ли́ца враго́в страны́ твоея́, и на́шу страну́ Росси́йскую си́лою моли́тв твои́х огради́ от всех наве́т ви́димых и неви́димых враго́в. Моли́ Бо́га о нас, о преподо́бная ма́ти, да не я́ростию Свое́ю обличи́т нас, ниже́ гне́вом Свои́м нака́жет нас за премно́гия грехи́ на́ша, но ми́лостию Свое́ю да огради́т нас и да да́рует нам вре́мя на покая́ние и исправле́ние. О преподо́бная Параске́во, всех, собра́вшихся в сем хра́ме и с любо́вию чту́щих святу́ю па́мять твою́, осени́ твои́м заступле́нием и испроси́ у Царя́ сил, Ему́же со А́нгелы предстои́ши, коему́ждо благопотре́бная во вре́менной жи́зни сей, па́че же помози́ нам достиже́нии Ца́рства Небе́снаго в бу́дущем ве́це твои́ми те́плыми моли́твами и хода́тайством ко Го́споду на́шему Иису́су Христу́, Ему́же подоба́ет вся́кая сла́ва, честь и поклоне́ние со Отце́м и Святы́м Ду́хом, ны́не и при́сно и во ве́ки веко́в. Ами́нь.
